Frauenfelder Woche

Frauenfeld · 24.07.2019

Erscht Auguscht

Mä hätt dä Sutter gfroget, ob är am Erscht Auguscht s’nöchscht Johr ume wär. Sie sueched öppert, wo dänn redt a dä Bundesfiir, ob är das ächt wett. Är seg doch im Gmeindrot engagiert und lokalpolitisch etabliert.

 

 

S’letscht Johr hegis d’Huber Käthi gmacht mit Humor und i dä regionale Tracht. Är chöni sich’s überlege. Sie fröged im Fall aber au nöd jede. D’Käthi heg für sich öppis chöne useziäh, sie segi jetzt populär wiä niä.
Wenn er nöd weli, machis halt en andre suscht. Dä Sutter hätt mituurem Bluet us diverse Gründ gseit: «Isch guet.»
Redä vor villne Lüüt isch öppis, wo em Sutter nöd guet liit. Und dänn no das mit em Mikrofon: än Graus, aber ebä, d’Reputation. Ä ganzi Wuche hätt dä Sutter a sinre Red umegmacht und studiert, bis er dänn ändlich gmerkt hätt, dass das mit sinre Red nüt meh wird. Hätt gmerkt, er stoht total im Schilf und lüütet em Truebi ah und sait: «Zu Hilf! Wenn ich’s nöd mach, dänn froged’s öpper andersch suscht.»
Dä Sutter hätt am Erscht Auguscht a dä Bundesfiir gredt zu allne Lüüt. S’isch luschtig und underhaltsam gsii, das mit em Mikrofon isch aber so äs Züg. Är hätt’s nöd immer troffe und wenn scho, dänn mit dä Hand, sogar wo mä d’Hymne gsunge hätt für s’Land. Mä hätt dä Sutter trotzdem gfiiret und dä Sutter isch eis gsii mit dä Wält.
Bim Apéro undrem Zält, seit dä
Truebi: «Jetzt hett ich gärn mis Gäld.» Dä Sutter git zweihundert Franke, dä Truebi seit «Danke» und schwanket dävoh go tanze.
D’Käthi Hueber hätt das registriert, isch anecho und hätt au gratuliert. «Das hett ich vo dir aber au nöd dänkt», hätt sie gseit und hätt dä Zeigefinger gschwenkt. Hätt ahgstos-se mit me Gläsli Wii und gseit: «Ä schöni Red isch’s trotzdem gsii. Dä Truebi, dä weiss, was es brucht, dass mä lacht. Für mich hätt er’s s’letscht Johr für en Hunderter gmacht.» 
David Lang

(nach dem Lied «Erscht Auguscht» vom Album «Kutscher»)